25-26 ივლისს თავისუფალი უნივერსიტეტის ბაზალეთის სასწავლო ცენტრში თავისუფალი უნივერსიტეტის აზიისა და აფრიკის ინსტიტუტის (საერთაშორისო ურთიერთობების სკოლა) და მომავალ დიპლომატთა კლუბის ორგანიზებით ჩატარდა ზაფხულის სკოლა თემაზე “კრიზისების მართვა და უსაფრთხოება”.
ზაფხულის სკოლის მონაწილეები ორი დღის განმავლობაში იღებდნენ დამატებით ცოდნას მათთვის საინტერესო საკითხებზე მოწვეული სპიკერებისგან, ერთვებოდნენ დისკუსიებში და მუშაობდნენ ჯგუფებში.
ნიკა რურუა
ზაფხულის სკოლის მონაწილეებს პირველი ლექცია ნიკა რურუამ (საზოგადოება „ივერიის“ დამფუძნებელი, საქართველოს კულტურისა და ძეგლთა დაცვის მინისტრი (2008-2012) ) წაუკითხა. ლექციის თემა იყო “2008 წლის გამოცდილება რუსული აგრესიის დროს და გამოტანილი გაკვეთილები”. ბატონმა ნიკამ დეტალურად აღწერა ომის დროის საქართველოს მთავრობის მოქმედებები და გაამახვილა ყურადღება სწორ და არასწორ ნაბიჯებზე. ლექციის შემდეგ გაიმართა დისკუსია, დისკუსიის შემდეგ კი ბატონმა ნიკამ კლუბს სამახსოვროდ გადასცა წიგნი What Everyone In The Free World Should Know About Russia.
დავით სიხარულიძე
ზაფხულის სკოლის მონაწილეების მეორე სპიკერი “საქართველოს.ატლანტიკური საბჭოს” დირექტორი, საქართველოს საგანგებო და სრულუფლებიანი ელჩი აშშ-ში, კანადასა და მექსიკაში (2006-2008 წ.), საქართველოს თავდაცვის მინისტრი (2008-2009 წ.) დავით სიხარულიძე იყო. ბატონი დავითის ლექციის თემა გახლდათ “უსაფრთხოების პოლიტიკია – თეორია და პრაქტიკა”. ლექციის შემდეგ ზაფხულის სკოლის მონაწილეებმა ბატონ დავით სიხარულიძესთან და ნიკა რურუასთან ერთად სიმულაციური ვორქშოფის ფარგლებში შეიმუშავეს სახელწმფიოს უსაფრთხოების დოკუმენტი.
სიმულაციური ვორქშოფი – სახელწმფიოს უსაფრთხოების დოკუმენტის შედგენა
თინათინ ქაროსანიძე
ზაფხულის სკოლის პირველი დღის მეორე ნაწილში მონაწილეები ტერორიზმის საფრთხეებს გაეცნენ. მათ ლექცია “ტერორიზმი ლიდერის გარეშე, საფრთხეები კავკასიის რეგიონისთვის” თავისუფალი უნივერსიტეტის აზიისა და აფრიკის ინსტიტუტის დეკანმა თინათინ ქაროსანიძემ წაუკითხა. ლექციის ფარგლებში ქალბატონმა თინათინმა მონაწილეებს აუხსნა თუ რატომ ხდება ადამიანი ტერორისტი, როგორია დღეისათვის აქტიური ტერორისტული ორგანიზაციების სტრუქტურა, მიზანი და მოქმედების ხერხები. აღნიშნულმა თემატიკამ მონაწილეების განსაკუთრებული ინტერესი დაიმსახურა.
ზაფხულის სკოლის პირველი დღის ბოლოს მონაწილეები ჯგუფურად შეუდგნენ მუშაობას კრიზისების თემატიკაზე. ოთხი ჯგუფი ოთხ აქტუალურ კრიზისს განიხილდა. ჯგუფები მუშაობდნენ სირიის, უკრაინის, ირანის და საბერძნეთის კრიზისებზე, იკვლევდნენ ამ კრიზისის გამომწვევ მიზეზებს, მთავრობის ქმედებებს, გადაჭრის გზებს და ფიქრობდნენ სამომავლო პერსპექტივებზე
პირველი ჯგუფი მუშაობს სირიის კრიზისზე
ჯგუფი მეორე – საბერძნეთის კრიზისი
მესამე ჯგუფი მუშაობს ირანის კრიზისზე
მეოთხე ჯგუფი განიხილავს უკრაინის კრიზისს
ზურაბ ჯაფარიძე
ზაფხულის სკოლის მეორე დღეს მონაწილეებს ლექცია საქართველოს პარლამენტის წევრმა, ახალი პოლიტიკური ცენტრის დამფუძნებელმა ზურაბ ჯაფარიძემ წაუკითხა. ლექცის დროს განხილული იყო მსოფლიოს ფინანსურ-ეკონომიკური კრიზისები, მათი გამომწვევი მიზეზები და გადაჭრის გზები. ბატონმა ზურაბმა განიხილა სხვადასხვა ქვეყნის მაგალითი და გააცნო მონაწილეებს საკუთარი ხედვა თუ რა უნდა გააკეთონ ქვეყნებმა კრიზისებისგან თავის ასაცილებლად.
გიგა ბედინეიშვილი
ზაფხულის სკოლის ბოლო ლექცია საქართველოს პრეზიდენტის ყოფილმა მრჩეველმა, თავისუფალი და აგრარული უნივერსიტეტების ბიზნეს ადმინისტრირების სკოლის დეკანმა გიგა ბედინეიშვილმა წაიკითხა. ლექციაზე განხილული იყო ”უსაფრთხოების ეკონომიკური ღირებულება”.
ზაფხულის სკოლის დასასრულს მონაწილეებმა ვორქშოფის ფარგლებში დამუშავებული პრეზენტაციები წარმოადგინეს სირიის, უკრაინის, ირანისა და საბერძნეთის კრიზისების შესახებ.
უკრაინის კრიზისის პრეზენტაცია
საბერძნეთის კრიზისის პრეზენტაცია
ირანის კრიზისის პრეზენტაცია
სირიის კრიზისის პრეზენტაცია
პროექტის ბოლოს გამოვლინდა 15 საუკეთესო მონაწილე, რომელიც გაემგზავრება უკრაინაში, ქალაქ კიევში 28 აგვისტოდან 1 სექტემბრის ჩათვლით, ტარას შევჩენკოს სახელობის სახელმწიფო უნივერსიტეტში ზაფხულის სკოლაში.
სკოლის თემაა “პოსტ-საბჭოთა ქვეყნების ლიბერალური რეფორმირების პროცესი და ახალგაზრდული მოძრაობების ფორმირება“. ზაფხულის სკოლაში უკრაინის მხარის მიერ ფინანსდება კიევში ცხოვრება, სამჯერადი კვება, პროექტში მონაწილეობის მიღება.
15 საუკეთესო მონაწილე უფასოდ მიიღებს მონაწილეობს კიევში, ზაფხულის სკოლაში
მომავალ დიპლომატთა კლუბი დიდ მადლობა უხდის პროექტის ყველა სპიკერს, მონაწილესა და ორგანიზატორს.
